Mae Williams, sydd yn rhan o grwp o chwaraewyr ifanc sydd yn datblygu yn y rhanbarth, wedi denu sylw ar lefel rhanbarthol yn barod. Mae'r maswr 18 oed, o Lanelli, sydd hefyd wedi chwarae yn safle'r cefnwr wedi chwarae deirgwaith i'r Scarlets y tymor hwn, gan sgori cais yn erbyn Teigrod Caerlyr yn y Cwpan LV=. Mae wedi chwarae naw gem i Glwb Rygbi Llanelli gan sgori 140 o bwyntiau.

Mae Williams yn dilyn yn ol troed maswr y Scarlets a Chymru Rhys Priestland a chwaraeodd ei gem gyntaf i "Help for Heroes" yn 2008.

Yn ymuno a Williams y bydd y prop Peter Edwards, 31, sydd yn ei ail dymor gyda'r rhanbarth ac sydd yn dychwelyd i'w lawn ffitrwydd ar ol torri ei fraich y llynedd. Ganwyd Edwards yn Shrewsbury ac mae hefyd yn chwarae i Glwb Rygbi Llanymddyfri.

Dywedodd Prif Hyfforddwr y Scarlets, Nigel Davies, sydd wedi rhyddhau'r chwaraewyr ar gyfer y gem: "Yn gyntaf ry'n ni'n falch iawn o gefnogi'r gem yma sydd yn cefnogi achos pwysig iawn. Fe fydd y ddau chwaraewr yn siwr o gael profiad arbennig o ganlyniad i fod yn rhan o'r garfan a chwarae gyda rhai o'r chwaraewyr a ymddangosodd yn y Cwpan Byd.

"Fe fydd yn gyfle arbennig iddyn nhw gymryd cam arall yn eu datblygiad a phrofiad fel chwaraewyr rygbi."

Yn gyfrifol am dim Hemisffer y Gogledd y mae'r cyn Scarlet a chwaraewr rhyngwaldol Ieuan Evans, dywedodd: "Peidiwch anghofio pan chwaraeodd Rhys Priestland doedd fawr o neb wedi clywed amdano yn 2008 ac edrychwch ar ei lwyddiant ef erbyn hyn.

"O'r hyn yr wyf yn ei glywed o Barc y Scarlets, mae'r hyfforddwyr a'r cefnogwyr yn meddwl lot o Jordan Williams ac fe all ddatblygu i fod yn gystadleuaeth brwd i Rhys am grys y maswr yn rhanbarthol. Fe fydd yn brofiad arbennig i'r chwaraewyr i fod yn rhan o'r tim."

Mae Her Rygbi'r Arwyr er budd Help for Heroes ac mae'n cael ei gefnogi gan JP Morgan. Fe fydd y gem yn cael ei chwarae ar ddydd Sadwrn 3ydd Rhagfyr 2011 yn Stadiwm Twickenham cic gyntaf 4.30pm. Mae tocynnau ar gael o Ticketmaster am £15 oedolyn, £10 dan 16. Am wybodaeth pellach ewch i www.heroesrugby.org.uk.