Wrth i’r chwaraewyr rhyngwladol ddychwelyd i gryfhau carfan y Scarlets, Ulster a lwyddodd i ddatblygu’r momentwm yn gynnar yn y gêm ac ennill tir yn gyflym. Roedd y Scarlets yn awyddus iawn i ddangos y bwriad yn gynnar iawn yn y gêm ac fe aeth yr asgellwr Joe Ajuwa, o Lanymddyfri, ar garlam trwy rhai o chwaraewyr Ulster. Daeth y bêl yn ôl i’r mewnwr Tavis Knoyle a basiodd i’r maswr Rhys Priestland, ac yna aeth at Andy Fenby. Llwyddodd Fenby, gyda’i gryfder a’i gyflymdra, i garlamu dros y linell gais a chael pwyntiau cynnar ar y sgorfwrdd. Troswyd y cais gan Priestland i sicrhau saith pwynt cynnar i’r Scarlets.

Sbardunwyd Ulster i ymateb yn gadarn ac edrychodd yn debyg ei bod wedi sgori cais, ond roedd y bas ymlaen. Roedd y Gwyddelod yn awyddus iawn i ddominyddu’n gynnar iawn ac fe giciwyd y bêl i’r cornel.

Chwaraeodd y ddau dim rygbi agoriadol iawn, gan basio’r bêl yn llydan, a sicrhaodd chwarae difyr iawn ond cynyddu wnaeth y posibilrwydd o gamgymeriadau. Cosbwyd y Scarlets ddwywaith am fwrw’r bêl ymlaen wrth i’r bêl ddod allan yn gyflym.

Aeth Ulster am gôl adlam wrth i’r cloc ddangos pymtheg munud ond aeth y bêl i’r ochr anghywir o’r pyst a rhoi cyfle i’r Scarlets chwarae yn ôl atynt.

Daliwyd pêl uchel gan y cefnwr Dan Newton yn ddwfn yn nhir Ulster, a oedd yn dechrau ei gêm gyntaf y tymor hwn i’r Scarlets, ac fe gliriwyd y bêl dros yr ystlys. Rhedwyd y bêl yn ôl yn gyflym gan Ulster ac enillwyd tir yn ôl yn hanner y Scarlets.
Enillodd y Scarlets sgrym yn nhir Ulster ac fe arweiniwyd ymosodiad gan y blaenwyr a death y bêl yn ôl i’r mewnwr Knoyle, symudodd o amgylch taclwyr Ulster ac fe groesodd y linell i sicrhau pump pwynt i’r Scarlets. Ni lwyddodd Priestland i gicio’r bêl rhwng y pyst. Scarlets 12 Ulster 0.

Daeth y bêl i ddwylo’r clo Dominic Day, sydd newydd ddychwelyd ar ôl derbyn llawdriniaeth i’w bigwrn, yn y linell ac fe ddechreuwyd ymgyrch newydd tuag at y linell gais. Penderfynodd Priestland fynd am y pyst ond methu a wnaeth gyda’i ymgais am gôl adlam. Chwarae craff oedd hyn fodd bynnag oherwydd roedd y dyfarnwr yn chwarae mantais i’r Scarlets ac fe rhoddwyd cyfle arall i Priestland sicrhau tri phwynt gyda gôl gosb, ac yn wir dyna a wnaeth.

Fe weithiodd yr hanneri, Priestland a Knoyle, yn dda gyda’i gilydd a gwelwyd sgiliau da wrth iddynt fynd trwy symudiadau mor gyfforddus a fydden nhw ar y maes hyfforddi.

Cosbwyd Ulster unwaith eto am blymio i mewn yn y ryc. Rhoddwyd cic rhydd i’r Scarlets ac fe anelwyd hi at y cornel; unwiath eto’n dangos yr awydd hwnnw i sicrhau buddugoliaeth a cheisiau.

Llwyddodd Ulster i sicrhau eu pwyntiau agoriadol ym munud ola’r hanner cynta’ wrth i Humphreys gicio gôl gosb.

Sgor ar yr hanner: Scarlets 15 Ulster 3

Ulster a lwyddodd i ennill y pwyntiau cynta’ yn yr ail hanner, er i’r Scarlets ddechrau’n gryf iawn. Aeth y maswr Paddy Wallace trwy dwll yn llinell amddiffynol y Scarlets am gais cynta’r Gwyddelod.

Anfonwyd David Pollock i’r gell gosb am ddeng munud yn dilyn cyfarwyddiadau cyson gan y dyfarnwr.

Daeth y bachwr rhyngwladol Matthew Rees i’r cae am y tro cynta’ ers iddo dderbyn anaf yn ystod cyfres yr Hydref.

Chwaraeodd y Scarlets rygbi cyflym gan ddangos yr hyn y maent yn gallu ei gyflawni. Aeth Dom Day ar garlam gan fwrw trwy amddiffyn Ulster ond fe’i loriwyd o fewn 22 Ulster.

Munudau’n ddiweddarach aeth Knoyle ar garlam gydag ymdrech unigol arbennig yn ddwfn o hanner y Scarlets. Ciciodd y bêl ymlaen ond ni lwyddodd i gyrraedd mewn pryd. Chwaraeodd y Scarlets rygbi ymosodol iawn gan symud yn agosach at linell Ulster.

Daeth y cais yn y pendraw i’r maswr Priestland a rhedodd yn llydan i groesi ger y cornel. Aeth ymlaen i drosi’r cais yn llwyddiannus.

Scarlets 25 Ulster 8

Parhau i ddominyddu wnaeth y Scarlets gan reoli’r chwarae ond nid oeddynt yn ddigon clinigol i orffen y symudiadau a sichrau’r pwyntiau. Ni ddaeth y pedwerydd cais a’r pwynt bonws ond fe sicrhawyd buddugoliaeth angenrheidiol a pherfformiad cryf a phedwar pwynt yn y Cynghrair Magners

Seren y Gêm: Tavis Knoyle

Sgor terfynol: Scarlets 25 Ulster 8