Fe ddaeth Treviso i hanner y Scarlets yn gynnar ac fe gosbwyd y Scarlets unwaith eto, y tro hwn yn ardal y dacl am beidio a rhyddhau. Arweiniodd hyn at gôl gosb i Tonias Botes, a phwyntiau cyntaf Treviso yn y Cynghrair Magners wedi ond naw munud o chwarae.

Edrychodd y Scarlets i ledu'r bêl a chodi'r tempo. Fe ddaeth cais i Priestland wrth i fwlch agor yn y lein. Roedd yna sawl chwaraewr yn barod i dderbyn y bas ond fe aeth Priestland yr holl ffordd trwy amddiffyn gwael Treviso.

Roedd yn gais agoriadol da i setlo'r nerfau yn yr ornest fawr hon.

Daeth gwaith amddiffynol ac ymosodol arbennig gan y Scarlets i ddianc o'u 22. Cosbwyd yr Eidalwyr am ddal ymlaen yn y dacl ac fe arweiniodd at gyfnod o chwarae diflas wrth i'r ddau dim gicio'r bêl yn ôl ac ymlaen gan geisio ennill mantais tu ôl i'r linell amddiffynol.

Gwelwyd wal amddiffynol gadarn y Scarlets ar hyd y cae heb ffordd i Treviso dorri drwodd. Ciciwyd gôl adlam gan y maswr Khristopher Burton i ddod a hwy yn ôl o fewn pwynt.

Unwaith eto fe giciodd Botes tu ôl i linell amddiffynol y Scarlets ond fe ddefnyddiwyd y tro hwn gan yr asgellwr Andy Fenby a basiodd i'r cefnwr Morgan Stoddart, y canolwr Gareth Maule ac yna i'r asgellwr ifanc George North. Daeth cais i'r g?r ifanc ar ei ymddangosiad cyntaf yn y Cynghrair Magners. Roedd y bwriad yn awr yn amlwg gan y Scarlets.

Daeth ail gais i North o sgrym y Scarlets, pasiwyd y bêl i'r canolwr Regan King a basiodd i North; defnyddiodd ei gryfder i groesi'r linell gais. Troswyd gan Priestland.

Sgôr hanner amser: Treviso 9 Scarlets 22

Fe gymrodd Priestland fantais o gic hir Treviso i ddechrau'r ail hanner gan sicrhau tir gyda chic enfawr ar hyd y cae.

Cosbwyd y Scarlets unwaith yn rhagor wrth i'r camddisgyblaeth ddod yn ôl i'r gêm ac fe ddefnyddiodd Botes i'w fantais i ychwanegu tri phwynt i sgôr Treviso.

Ym munudau agoriadol yr ail hanner rhoddwyd y Scarlets o dan bwysau wrth i linell ymosodol Treviso symud yn nes at y linell gais ond yn ffodus fe aeth y bêl dros yr ystlys.

Gyda ond saith munud ar y cloc yn yr ail hanner fe ddaeth cais i Treviso gan ddod a'r sgôr i 17-22.

Munudau'n wedyn fe gododd yr Eidalwyr y tempo gan ddawnsio o amgylch llinell amddiffynol y Scarlets a sgori cais o dan y pyst.

Effeithiwyd y Scarlets gan y pwysau a chosbwyd sgrym yr ymwelwyr gan rhoi gyfle i'r tim cartref gicio i ennill tir.

Gyda ugain munud yn weddill ar y cloc setlodd y Scarlets unwaith eto gan ddechrau ymosod yn ddwfn yn hanner Treviso.

Yn dilyn tacl anferthol gan yr eilydd Jonny Fa'amatuainu cosbwyd Treviso ac fe gipiodd y Scarlets tri phwynt arall o esgid Priestland.

Dilynwyd hwn yn fuan wedyn gan gic hir ar hyd y cae gan Priestland ac fe ddaeth pumed gôl gosb iddo ar ôl 69 munud ac fe aeth y Scarlets ar y blaen o bwynt.

Bu'r deng munud olaf yn emosiynol ac fe cafwyd diweddglo haeddianol i'r gêm hanesyddol ond yr Eidalwyr aeth a hi wrth iddynt sgori cais a dwyn y fuddugoliaeth oddi wrth y Scarlets.

Sgor terfynol: Treviso 34 Scarlets 28.

Fe fydd y Scarlets yn croesawu Connacht i Barc y Scarlets ar gyfer gêm cartref cynta'r tymor ddydd Sadwrn 11eg Medi (cic gyntaf 3pm).