Cafodd Stephen Jones gyfle cynnar i brofi ei allu a dangos pam ei fod mor werthfawr i’w dîm. Wedi dwy funud, roedd wedi rhoi’r Scarlets driphwynt ar y blaen.

Ymateb y tîm cartre’ oedd sgori cais. Y blaen asgellwr Willie Faloon yn croesi a’r maswr Ian Humphreys yn trosi. Roedd mantais gynnar y Scarlets wedi mynd ac roedden nhw bedwar pwynt ar ei hôl hi.

Cosbwyd asgellwr Ulster, Andrew Trimble am ddal ei afael yn rhy hir ar y bel. Cyfle arall felly i Stephen Jones fynd am y pyst, ac unwaith eto roedd yn llwyddiannus.

Roedd y mewnwr Isaac Boss yn edrych yn beryglus pan gafodd y bêl ei ddwyn o gefn y sgrym, a rhedodd yn hyderus at linell y Scarlets. Ond collodd y bêl.

Dangoswyd y garden felen i’r prop Rhys Thomas am dacl waywffon honedig ar y blaenwr ail reng, Ryan Caldwell. Cymrodd Humphreys ei gyfle a rhoi ei dim ar y blaen o 10-6.

Daeth cyfle arall i Stephen Jones. Cic gosb o flaen y pyst a thri phwynt arall i’r Scarlets.

Aeth yr ymwelwyr nôl ar y blaen wedi cic gosb arall gan Jones, un o chwaraewyr Ulster yn cael ei gosbi am bas aeth ymlaen. Ulster 10 Scarlets 12.

Saith munud cyn diwedd yr hanner cyntaf, roedd Ulster yn ôl ar y blaen. Llinell amddiffynnol y Scarlets yn cam sefyll a Humphreys yn llwyddo gyda’i gic.

Y cicio oedd yn rheoli’r hanner cyntaf, a daeth cyfle arall eto i Humphreys. Methodd ei gic y tro hwn, er ei fod yn syth o flaen y pyst.

Llwyddodd Martin Roberts i rwystro Ulster rhag sgori eu hail gais, ychydig cyn diwedd yr hanner cyntaf.

Cosbwyd yr asgellwr Sean Lamont am dacl uchel ar Paddy Wallace ac roedd y gic gosb yn llwyddiannus. Ulster ar y blaen o bedwar pwynt ar yr egwyl.

Ulster gafodd pwyntiau cynta’r ail hanner, cic gosb gan Humphreys, Ulster 19 Scarlets 12.

Roedd y pwyntiau cynnar wedi ysbrydoli pac Ulster, a chyn hir roedd Trimble wedi croesi am gais. Methodd y trosiad. Roedd cryn dipyn gan y Scarlets i’w wneud nawr, ar ei hol hi o 24 – 12.

Fe aeth pethau’n waeth. Croesodd yr asgellwr Timoci Nagusa am gais arall i Ulster, wedi i’r Scarlets ildio’r meddiant. Troswyd gan Humphreys.

Roedd yn mynd i fod yn ugain munud olaf anodd iawn i’r ymwelwyr.

Doedd cais gan Lee Williams ddim wedi cael ei ganiatáu gan y pedwerydd swyddog. Barnodd bod coes Williams wedi croesi’r ystlys.

Roedd yn edrych fel petai popeth ar ben i’r Scarlets pan laniodd pass wyllt yn nwylo Trimble ac fe groesodd am ei ail gais gan sicrhau pwynt bonws i Ulster. Trosiad gan Humphreys. Ulster 38 Scarlets 12.

Daeth llygedyn bach o obaith i’r Scarlets pan groesodd y canolwr Jon Davies am gais, ac fe’i droswyd gan Stephen Jones. 38 - 19 nawr.

Yr hoelen olaf yn yr arch oedd yr eilydd Ian Whittle yn sgori cais rhwydd o dan y pyst, a Humphreys yn trosi’n llwydianus unwaith eto. Ulster 45 Scarlets 19.

Dangosodd Davies rywfaint o’i ddygnwch a’i allu wrth groesi am ei ail gais. Ond, unwaith eto roedd yn enghraifft o rhy ychydig, rhy hwyr. Pan ddaeth y chwiban olaf, Ulster oedd y buddugwyr o sgôr sylweddol, 45 - 24.